人生最恐怖的經歷！ 小曲發燒抽筋！

繼上個月london之旅，小曲發燒抽筋後休克後，今次又再一作發燒抽筋！！
上次我不在場，只有聽大曲形容，我只是想像抽筋就好似我地平時抽筋一樣。對腳要伸直之類。。。
原來。。係咁恐怖！！

星期五一早，帶左小曲去做一歲的身體檢查同打針，檢查就係簡單咁照下耳仔，聽下心，按下手腳。。。
之後就打針。。打針時小曲的反應不大，只係喊左幾秒，好叻仔！！
我都有少少心理準備佢可能會發燒。。但成個下午佢都好正常好活潑。。
一到晚上，佢就好累，行又行唔到，所以早少少比奶佢飲，就比佢訓。。
訓左2－3個鐘後，佢又ee哦哦起左身。。。成個人都唔係幾舒服
但我地無即刻比退燒藥佢食，諗住佢要靠下自己抵抗力，唔好下下靠藥物。。
又過左2個鐘，佢都係訓下醒下咁，我地就放佢係我地張床同我地一齊訓
同時都比左退燒藥佢食，幫佢量左有38.1度，唔算好燒。。

之後我地就熄燈訓教。。。唔夠3分鐘，聽到佢發出怪聲。。一直咁“唔。。。。“，係唔斷氣咁一直“唔。。。“
我地就開燈睇佢咩事。。。點知大曲一見就話“佢上次係london就係咁喇“。。
當時好驚！！ 見到小曲雙眼睜到好大，大到就快唔出來咁濟，一直斜視同一方向！
雙手好大力同好有規律咁上下抽動，對腳拉到直一直，一直發出“唔。。。。“既聲音
佢雖然係打開眼，但你睇得出佢無意識，睇你唔到，只係一直叫一直抽。。。好恐怖！！
當時好驚，只係喊住咁拍小曲塊面同叫佢個名。。
大曲即刻叫我冷靜，我即刻好似拍戲咁收左把聲，驚影響小曲。。。
後來大曲除哂小曲d衫，用水幫佢降溫。。。
經過人生中最漫長既兩分鐘，小曲終於慢慢咁停左抽筋。。
對眼開始識得轉。。。但佢好累，郁都郁唔到。。。喊都喊唔到大聲。。。
只係識“唔。。。唔。。。。
經過一返折騰後。。。小曲終於訓著左。。。
我同大曲一左一右，都唔敢真係訓著，每隔幾分鐘就睇下佢仲有無呼吸。。。
到第二日，佢就變返正常活潑既小曲。。

呢兩分鐘簡直係人生最黑暗，恐懼，最漫長既兩分鐘。。。
真係寧願再受多幾次生產之痛，都唔想見到小曲咁。。。有幾秒真係覺得咁抽下抽下。。驚佢一抽就窒息。。。
真係好驚，原來一直以為生仔已經係人生最驚既一環，原來唔係。。。
見到自己個仔咁樣，神智不清，咁辛苦生佢出來，湊到佢肥肥白白。。。。

後來我上網搵過資料，話0－6歲既兒童，發燒抽筋好平常。。。雖然我未聽過身邊既朋友既bb有咁既問題。。
話男性又會比女性高。。。再話一歲前已經有過一次，之後再發既機會又再高 （小曲第一次抽筋時先11個月）
即係話，要擔心佢再抽筋既機會到佢6歲，個惡夢先會結束！！！！
而家我唔理，無論高燒低燒，有燒就食左退燒藥先。。。我唔想再見到咁可怕既事情再發生！！！
如果大家咁不幸，bb有咁既情況，要記得幫佢降溫，除哂衫，唔洗沖涼，但用毛巾抹身。。。
打側佢個身，以免有野吐出時會“續“到佢。。。（我上次無做）
希望所有人既bb都健康，唔好比d咁恐怕既畫面嚇親！！！

小曲一歲喇！！！

時間真係過得好快！！ 我仲記得上年生仔時既痛，小曲出世時成個外星人咁款。。。話咁快，已經有外星人變成人類！仲一歲喇！！！ 
我地係丹麥無咩朋友，小曲生日我地3個都係係家慶祝
星期六先去左阿麻家，叫埋姑媽同大曲僅餘既一個朋友，同佢老婆來慶祝小曲生日。。
小曲今日仲行左好多路，次次都好長。。。相信再過不久佢就可以自己一直行行行。。。
真係好矛盾，又想佢快d識行，但又覺得佢識行，已經唔洗你抱又好似好傷感。。。

為左小曲既一歲生日，我仲突登整左個超小型蛋糕給我地3人吃
星期六去阿麻家，再整一個比大家吃，呢個簡單得多，因為我只係去左買個餅底。。自己加生果同cream。。
個個都吃到讚不絕口。。。但我同佢地講個餅底係係街買。。都仲要讚我無計啦。。哈哈

正日星期五，我係家整左差燒，煎雞翼同肉醬意粉
好老實講我覺得今次整得麻麻地，可能驚d食物唔好味，咩都加重料，但仲衰左，平時仲好味。。
差燒太乾，雞翼好重酒味，肉醬意又係好乾。。。
是旦啦，好又一餐唔好又一餐。。。大把時間食。。
而禮物我地就準備左個白色吉盒，同兒童用既油漆，諗住用小曲既手腳印係個吉盒到
個盒叫做 Tim's Time Capsule, 我地會將小曲由細到大既物件，當然係有意義就放入盒到，等佢大時比返佢。。
另外我地再送左一部單車比佢，雖然仲有排先識踩，反正特價，買左先。。。哈哈
但部車居然要星期4先有貨，過哂生日。。。咁可能留比佢做xmas gift。。hehe

不過發覺小曲好鐘意聽人唱生日歌，我地對住佢唱，佢就好開心，仲要拍埋手。。

影得叫做最好既全家幅

小曲同大曲講：爸爸，你大個仔喇，要聽話呀


大老闆食食下成日棟隻腳出來玩yoga


食到一咀都係

阿麻家，食緊我整既mm形cookie


傳統既丹麥兒童生日會喎


生日禮物


我做比大家食既蛋糕

剛出世，成個外星人咁既小曲。。。

給小曲的生日蛋糕

其實一直都好想學整蛋糕，但好 驚自己會淪陷。。
因為一做就要自己食哂，就算大曲幫手佢都係唔食得幾多。。。
所以遲遲都唔開波做。。。
幾個月前整過藍莓芝士蛋糕，但d魚膠可能開得唔夠好，食個時有食到一粒粒膠
就滅左我團火。。。
之前係hk，買左幾個蛋糕模，最細既得5“，係比我地2個人吃。。。
食左都唔洗咁肥。。。唔洗一做就2磅蛋糕。。。
前排結婚週年整左個new york cheese cake，唔錯。。又唔大，2日吃哂！

因為近排臨近小曲生日，身為慈母既我，當然想為佢做蛋糕啦。。
原來個一個普通既海綿蛋糕，一d都唔簡單。。
因為呢到d超市實在好雞，唔好以為鬼佬超市一定好多唔同種類既麵粉。。
仲以為出產丹麥曲奇既丹麥仲會再多d選擇
原來呢到係無高筋粉，低筋粉。。。只有麵粉！！！
搞到我頭2次整海綿蛋糕都失敗。。。變成pancake！
最後上網搵到原來低粉可以用粟粉溝，溝完先做得成！！

係第3次先叫做係蛋糕！ 仲諗住今次都唔掂，就係超市買餅底。。。
再上網參考下其他餅家既做法。。。一個算成功既生日蛋糕終於誕生喇！！！ 
我ok自豪架。。。第一次整，算唔錯啦！！
我仲學人整朱力力生日牌。。。

完成圖。。。其實d cream真係幫左好大忙。。將醜陋既內臟遮

成功的海綿蛋糕

切3片後加cream加生果粒

用cream塗滿，原理就好似化妝一樣

上生果

10分鐘產檢

過了懷孕第25weeks，又要安排家庭醫生做產檢喇！
其實呢到d產檢真係唔多，可能加上第二胎仲好似比上次少左。。
不過我無咩事所以都無理，我都懶得出街。。次次抱小曲上落梯都無左半條人命！
去睇醫生，問我有無咩特別。。之後就磅重同量血壓。。都一齊正常！
已經去到75kg，就係個london之旅累事啦，重左3，4kg，
之後醫生check胎盤，話大細正常。。佢用手按架咋，唔係用機。。
大概10分鐘，睇完走得。。。
10分鐘聽落好似好快。。但我呢排上討論區，見到好多香港孕婦話等2，3個鐘，產檢5分鐘就送你走。。
比起我去到等5分鐘就有得睇10分鐘，我算好好架喇！ 

呢排小小曲郁得密左，開始係肚皮外都有感覺到佢郁。。
但應該仲未可以用肉眼見到。。
由於呢胎我已經太肥，所以到而家個肚已經有上次臨生小曲咁巨型。。。
晚晚受胃酸倒流，輾轉反側既折磨。。。本身膀胱已經好細既我，都已經要成日苛尿，而家更加係一晚苛2，3次。。。
仲要係已經忍左一排先去，因為我怕一起身又嘈醒小曲又無教好訓。。。

離預產假仲有3個月。。。已經開始擔心生個日喇。。。
有時d人話，你都生過啦，仲洗咩驚者。。
就係因為我生過，知道生個時有幾痛，咁先要驚。。
第一次，你唔知有幾痛，以為人人感受唔同，人地話痛者，又未必係咁痛既。。
只係幻想可以有幾痛。。。一個人一生中除非發生過咩大意外，唔係都應該想像唔到痛既程度去到邊。。
而生過既人，已經承受過痛楚，知道有幾痛，咁先驚。。。。
我而家只係希望，一係就快d，比我一痛就去到醫院生，唔好要我等幾粒鐘。。。
一係就等耐d，比我可以打到無痛分娩，唔好唔長唔短想打針又唔夠時間。。。

仲有，大曲同我講，話阿肥契媽話小小曲要好似小曲咁似大曲多d喎
似我佢會唔開心，隻死野丫，而家我好失禮你呀！
唔係有我半個血統你契仔有咁靚仔。。。哇哈哈哈。。
雖然我都非常認同你既說話，但都要唱下你。。hehe

蘿蔔糕

我好鐘意吃蘿蔔糕，所有澱粉類食物都係我澱粉怪首選
次次去親茶樓，一定要叫返碟。。。
而家來到丹麥，耐唔時去飲茶都會叫，但真係幾難食。。
難食我又叫，又貴，我真係自相矛盾，嘻嘻。。。
一直都好想試整，但好似工程好龐大，同埋之前無糕盤同蒸爐
上次回hk，特別買左蒸盤蒸爐，就係為左個蘿蔔糕。。。
點知返左來成半年，都仲未開工。。。
終於係星期2，叫老爺奶奶奶的左小曲返佢屋企
先可以安安靜靜咁開工。。。
原來大安旨意唔洗買冬菇，因為係hk帶左d靚同厚既冬菇返來，仲寄左一包來
點知前幾日收到個包冬菇生哂虫，紅色一粒粒，入面有成幾百隻，好核突！！！
再睇一睇下自己帶個包，又係生哂虫。。。我終於明白點解我個廚台成日都會有呢隻虫走出來
原來都係冬菇到嘔出來！！！ 狠下心將2包貴冬菇丟左。。。
整糕時先發現原來無哂冬菇，好彩好耐之前係呢到既中國店買左d好cheap既冬菇，反而cheap野無生虫
得返幾粒都好過無啦。。
再加上法國倏既“立腸“，一直對立腸無咩興趣，但整蘿蔔糕又唔可以無，迫住買左一包，貴到死！！
下次試下整糯米飯先！！ 嘻嘻。。。
搞左5個鐘，終於整完 （5個鐘包括我第一次學人曲奇，諗住小曲生日焗，所以要試整）
個作品完成後都唔可以即刻食，要雪一晚。。
第二日一早起身急不及待煎左幾片食，個型係ok唔錯，個味都幾好。。但。。。個蘿蔔就苦左少少。。
原來要係中間加糖，我平時好少住野加糖，因為我唔覺得d送甜左會特別好食。。仲要肥。。
但原來怕蘿蔔苦要加糖。。。下次一定會加。。
但整體來講都唔錯，我加左超辣辣椒醬，基本上都cover左個苦味。。

完成圖





蒸完後，個樣都有少少核突

第一次在家打邊爐

打邊爐係我的最愛之一。。。。當然最愛唔少得雲南米線。。
係香港時，每次打邊爐都要搵任食個d，因為每碟叫的話，以我同我darlings們的食量，應該埋單時每人幾百先出待街。。
咁多次打邊爐，最誇既一次應該係去darling april家個次。。。
個日一放工，我地去左惠康買料，除左打邊爐既料，我地仲買左薯片，榴槤，sarlee芝士蛋糕，等等雜食上佢家。。。
係april洗野個時，我同darling ashley就係個廳到歎住咁食薯片，之後再打邊爐，都唔明點解個時可以食咁多。。。

今次自己係家打邊爐，都係第一次。因為個日去中國店買食物，順便提議不如試下打邊爐
幸好我同大曲對肉都無咩興趣，佢有肥牛，羊肉，但都好貴。。所以我地都無買
係買左d丸，菜，金菇等。。自己再包左9菜雲吞。。。仲好好彩地個日99比左d龍蝦仔我地，仲有海鮮食。。。hehe
無人性既我地等仲等小曲晚上訓左先開始打，知佢一定會lur住咩都要吃，行來行去又危險。。

用龍利柳，一直以為只可以用來煎，點知上次係london打邊爐佢都係比龍利柳，又幾好味喎！
湯底係沙爹，我想麻辣架，但大曲想沙爹，就下佢啦

仲仲電影撈汁

海南雞飯

呢排整野食既筋又返來，突然好想學人整成隻雞
上網勁搵雞既食譜，搵到海南雞飯
仍記得以前在尖時返工時，耐唔耐會同以前同事而家darlings們去好時吃海南雞飯
多數去親都一班人，咁可以叫多d送
最鐘意佢個海南雞同炒蘿蔔糕，有時一碟唔夠叫2碟
對於炒菜同串燒我就麻麻。。。
今次自己試整一來可以一嘗我吃雞既欲望，
二來想學識多一樣送等小曲和小小曲大左可以多一樣野吃
雖然大曲對有骨既雞無咩興趣，都唔理佢
我唔明點解西人咁鐘意吃雞胸，又鞋烚烚
點煮都係難，我覺得雞比肉最正，佢就嫌有骨，真唔識貨！！
不同仲好，無人同我爭，仲有我最憎既雞胸可以比哂佢吃，哈
成隻雞除左屎忽同頸外都無浪費！！

其實除左隻雞外，我覺得個雞油飯都好重要
之前都諗好無扮瘦唔好整雞油，白飯算啦
但都係算把啦，要做做全套。。哈哈。。
點知大曲既評語係，個飯好正，但隻雞，就係雞。。。

我家無香港用既菜刀，是旦用長刀切，哈哈


我仲整左3隻醬，薑蓉，泰式醬（落太多蒜蓉，好勁蒜味），甜豉油