曲奇的近況

近況都係兩隻野輪住病，小曲病完一星期又到小小曲病一星期，之後又到小曲病一星期咁！

呢排小曲同小小曲都講多左野，小小曲自從返學多左講丹文！ 不過兩隻野都係遲，我朋友個月只大小曲一日，但已經係成個故事咁講！！ 而小曲只係幾個字咁去組成個意思，未完全係句子！ 不過，我都唔急既，反正而家知佢地係識講，但就係慢，都無咩所謂！

不過小小曲，真係好鬼皮！ 成日爬高爬低，仲打我地！問佢咩佢都nej（no）！
好多時都好把火！希望只係因為trouble 2既關係，雖然佢仲未到 2！

近期學校請左攝影師來影團體相，我地都影返幾張單人，係唔錯，但如果我知個背景係全白，我會幫小小曲著件有色衫囉！

呢個pose好似議員d宣傳照

肥母的近況

最近都無update，都係因為懶

講下學車進度：

我發覺本身個阿sir好唔掂，唔係佢教車唔掂

而係佢個人。。。

好燥，有時我只係問問題，如我見前面架車咁做，但我記得好似唔可以，

我就會問佢係咪唔得，因為我怕自己記錯。佢就會話世界上好多人都會犯規，唔代表你要跟！ 呢個唔算惡，有次仲惡，但太長我懶打。。。

我唔知佢架車原來要踩住個極力子先撻得著，我就撻唔著車，我問佢點解會咁

佢話，架車撻唔著，咁點算？返屋企啦不如？

我真係xyz！ 洗唔洗咁x串呀！ 

比緊成千蚊港幣個半鐘，唔係要你恭恭敬敬，但正正常常咁教得唔得呀？

佢仲成日呃鐘！ 好似學車前去苛個尿苛成5－7分鐘，又學車手時會開到去佢要辦事既地方，話佢要搞d野好快返，其他我覺得如果你係去放低d野我都可以接受。佢居然走去買泊車票，你買得車票都唔會快啦？ 我即刻拎計時，果然走左十幾廿分鐘！！ 

個堂就快完時，其實都仲有成10分鐘，已經開埋返去落堂地點，之前就講你有咩唔好，之後就會完結，都會早左5分鐘走！

以上種種，佢都唔會補返時間比我，全部係我比錢時候內扣的！ 

大佬，成千蚊堂，無左5分鐘都成舊水！ 咁樣同呃錢有咩分別？？

不過以上種種，都唔係我換阿蛇既原因，原因係有次佢唔比我book時間，我一月要開始返學，我想1月前搞掂，個course都大大話話去左4個月！ 最後一次我話要book時間下星期個堂，佢叫我下一堂先book，佢都要留時間比其他學生！

xyz！ 我唔係你學生呀？？ 我一星期book你2堂都阿支阿左，大佬，考個牌洗唔洗考成年呀咁！

最後，我決定換阿蛇！ 同時呢個新阿sir話佢有好多學生都係舊sir過去，因為學生好憎佢，好rude！ 好彩走左，都算走得遲，補左十幾個鐘先走！

原以為新sir可以密集式，快快一月前考牌。。。祟不知阿sir話呢排警察好難book（考牌係警察考的），有學生排左成個半月仲排緊！ 唉！ d錢燒一樣咁快就無左！ 又要keep住學，無學一排又生疏，但又無了期咁等！

另一個update係我一月開始返丹麥文

等左三年，終於開始了！ 由最初好憎，唔想返！ 到而家真係期待返學！

因為兩隻野開始講多左野，雖然佢地同我講中文，但有時佢同大曲講野我都想舍點解，下下問大曲我自己都覺得好煩！

最樣衰係去接放學，有時d小朋友同d仔講野或同我講野，我就好似白痴咁傻笑！

明知佢地唔識英文，我無理由同佢講英文，所以d小朋友同我講野我只好：笑！ 

呢兩個係我想學danish的主要原因

（e！ 咁講法我都係為左個仔，我真係好媽媽喇，哈哈哈！）

筆試，得左！

呢幾星期都坐立不安，因為28號要考筆試
筆試形式係有25幅圖，要答岩20幅圖，
每張圖有2－4條問題，要全對先叫做岩一幅

我做模擬試題時，覺得佢問d問題好古惑，又好模稜兩可
我做左30幾份試題，都無一次合格
所以我今次去考試，係去買六合彩既心態

歐洲呢幾日打風，仲落好大雨
踩單車去到火車站轉車已經濕左半條褲
好彩有雨褸同著boots

去到試場，頭幾題已經唔知佢問乜，亂填
心諗，死啦，頭幾題已經咁，無乜quota
點知打後個d又好易喎！ 個心又有返少少信心！
最後我分鐘係20／25。。。。剛剛好！
開心到呢！！ 唔洗再做d無聊模擬試題！

回家坐火車路上勁唔好彩，係就快到我個站時，司機話有棵樹壓住路軌
唔可以前進，要等人來救我地。。。
之後為左慳電，仲熄哂燈，暖氣
打風打到法法聲，好恐怖！
最最最慘既係。。。我好急尿！
其實上車已經有少少急，不過心想只有半個鐘車程都ok啦，好快到
頂佢丫，一等等左幾粒鐘！
中間司機又無講幾時有人來，點救我地等等
我幾驚要等到第日個風停左先可以走
火車又無廁所，我真係有d想搵個地方苛左佢算喇！
反正都黑哂，你睇我唔到我睇你唔到。。。
但成車都係人，又靜，忍左咁耐肯定勁大督，成車人都聽到。。。

等呀等，等左3個幾鐘。。。
終於見到有消防員，但係佢地唔係來救人，係附近清理大樹
搞左成粒鐘，先見到放人出去。。。仲要係middle of no where！！
無車車返我地去車站，我手提又無電，想靠gps都唔得
幸好後來有個女人經過，佢都係受害人之一
佢帶我返火車站，終於見到我部單車。。可以返屋企了！！

拯救最愛

肥人係好難買褲，買到岩而又著得好睇就更難喇
其實我都好幾年無著牛仔褲，著既都係打底牛仔褲
貪佢有彈性，食完又唔洗解褲頭，好方便
但自從我痴肥之後，真係好難買褲！
已經無牛仔legging岩，要著加加加加加大碼既布legging

上一次返香港，身形同我差唔多既朋友，都係我仔契媽
帶左我去jusco既top valu買左幾條legging
其中我買左條牛仔legging係我既最愛！
好難得一氣著得無咁肥，又係牛仔布，又好舒服既褲！
當時size係XL，深怕自己減肥後無得著再買多條L...
當xl袖個時著到而家都仲未著到L

就係因為成日著，次次出街都著，著下著下就磨爛大比
勁唔開心，唯一一條褲都爛左！
上youtube睇下有咩補救辦法，搵到個video教路，
但我搵唔到佢用既布，佢有幾片白色布係好似有黏性，
用熨頭一熨就會黏住要補既布，黏住後再聯會易同唔會走位
雖然搵唔到佢既用料，但我係ikea買左一條長形貼，
係整curtain用的，我用呢個頂當都ok，係無人地成片布咁方便
最後搞左個幾鐘，終於將我心愛既牛仔legging補回來
其實係有色差，但因為係大比內側位，一般走路都唔會比人發現

補前，個洞都幾大架

補後（反面）

補後（前面）

小曲升班了！

其實係小小曲返學既同時，小曲都升級了！

而家係返緊類似幼稚園既物體

呢到唔似香港，有咩k1，k2，k3

佢小學之前就咁一堆一齊返學

其實都係唱歌，畫畫，去遊樂場玩，

基本上同佢小小曲個級係一樣，只不過同學仔係年紀大d

以前係佢個班，佢係最大個隻。。。而家係最細個隻。。哈哈

暫時都見佢好鐘意返學，次次見到我又好開心返屋企

唔似以前唔想返屋企，我去接佢仲手刀跑走！

而家佢見到我，就同人講：呢個係我媽媽

哈哈，好似好以我為榮喎！

呢張係老師影，放係佢地個shelf上面，我見到張相係勁唔alright囉！

大佬，我個仔咁型仔，你影到佢好似鬍鬚“立骨”，仲有兩行鼻涕！

呢張係就快升班前，老師貼左張相係佢地個位，唔好坐錯

喇，呢張相就唔同喇，將佢童真一面展現出來！ 咁岩我影張相時，小曲見到佢自己，要搶返，所以隻手係佢的。。。哈哈

小曲的三歲生日

今次小曲的生日，我地請左幾位朋友

其實幾位都已經係我係丹麥既全部咁濟。。

因為我地家細，要去奶奶到搞。。。

老實講，我唔係好知生日會要整d咩，次次都係奶奶做食物，我係負責整蛋糕

點知今次奶幻叫我諗menu。。。其實真係唔知食乜

香港既話就容易啦，整d雞翼，魚旦，菠蘿。。。

但呢到西人較多，真係怕整左無人食。。。真係好頭大。。。

最後菜單有。。。。

生日蛋糕

西瓜蛋糕（成個都係西瓜做，係類似生果拼盤）

小腸仔包

蛋撻

shortbread

肉柱卷（奶奶做）

其他零食小食

因為第一次請咁多人（我平時食飯只會請一家人）

心情真係好緊張，擔心食物唔夠就好樣衰

我真係成晚都訓唔著

由下午6點就焗焗焗，搞搞搞，搞到成第日8點先去訓

幸好最後生日會都好成功，朋友們都好欣賞我整既食物

最重要係其中一個朋友老公係廚師，連佢都讚我既蛋撻！！

最後食物不但夠食仲有剩，我真係失心瘋整得太多。。。哈

好彩，第日到小曲學校搞的生日會可以派上用場！

不用多說，今次生日會小曲又收到好多玩具。。

係多到我個份都未拆。。。

仲好，慳返，留返做聖誕禮物。。。哈哈

幸好有朋友自備相機，仲唔覺意影到我，唔係我係無係生日會出現過

人生第一次整蛋撻整得咁靚

呢張相完全表現出我既自然美

朋友幫小小曲影到既靚相

 中間就係西瓜蛋糕，我幾鐘意呢個idea，可能我鐘意食西瓜，食得漏漏地就去切件食下

小型腸仔包，小朋友食兩口就食哂

禮物時間

可憐的我要自拍先証明自己存在

當然小小曲都要影返張

到小曲學校生日會

蛋糕係之前一日整左兩個，係生日會只食左一個。另一個可以派上用場，慳返好多時間唔洗又整一個！

個西瓜本來想整多個西瓜蛋糕，但最後都係放棄。。。太累了！

小小曲上學了！！！！！

yeah！！！！ 終於等到呢日喇！
本來醫生話佢2歲先可以返nursery，但呢排見佢情況都ok，就早d比佢返
其實醫生係叫我地比佢返家庭式個隻，者係一個大人湊3－4個小朋友
話唔會有咁多病喎
但我其實唔係幾鐘意呢個，因為我想佢同多d唔同既小朋友玩
呢隻就來來去去都係得個幾個小朋友，同埋得一個大人，我覺得會好難照顧到佢。。
我都係一對一咁照顧佢，而家要人地一對四，根本無咩可能囉！
我地初初同學校傾話佢要好多時候照顧佢，要好多時間換片。
學校話ok架喇，佢地handle到，唔得先會向政府申請專人照顧
第一日返學，我向老師解釋要點樣去換片，
1。括走d屎
2。要濕水清潔
3。印乾
4。噴aaa
5。查bbb
6。再查ccc
7。都係查ddd
8。最後加一堆eee
完成。。。佢地係o哂咀！
最重要係，呢個程序係每1－1。5小時都要重複又重複咁做。。。
最後返完第一日學佢地已經同我地講會請多個人幫手
我聽到都有放心。。。佢地起碼真係有聽到我講野，唔係求其敷衍我
同埋有專人跟住小小曲，更加放心，唔洗驚佢羅友爛先啦！

小小曲除左換片同飲食要注意外，其他野佢都學得好快！
佢好快已經當左個班房係自己屋企，爬高爬低，開門，倒玩具！ 哈哈

希望小小曲快d可以返全日，咁我就終於可以訓晏教訓到自然醒！
暫時我目標係用一個月，每日送完返學就返屋企訓，訓到接放學
應該可以補返我呢幾年訓唔夠既時間。。。到時再為自己安排出路
可能返下學咁啦！ 不同最期待都係可以連續訓6個鐘。。。

第一天

 第二天係星期五，逢星期五高班低班都會一齊係個大廳到唱歌，小曲入來見到我地好開心，坐係我地隔離唔肯走

 好似好開心咁喎

小小曲入蜜蜂班

第三日返學，有小朋友生友，佢成個老闆咁款

再遊倫敦

London一直都係我地兩個既最愛（in Europle）。。。
因為shopping夠平，比起丹麥。。
又多亞洲野食。。。
最緊要係我地較熟，唔洗探路。。

以前好似意扮哂backpacker，去好多新國家新地方，住backpacker
而家一抽二能，二片曲奇又e哇鬼叫。。。當然係用最快既速度抵達目的地！

今期我地訂左Primer Inn Hammersmith，我以前做野間餐廳隔離
以前同大曲都住過，今次訂了家庭房，房間大小ok，有好多空位走動，但最失敗係無雪櫃，有小朋友無雪櫃好煩，想買定d yogurt做早餐都唔得！

話哂今次帶埋2個仔，唔可以只係得shopping同食。。所以都搵左d小朋友岩既地方，本身想去thomas land。小曲近期係超級fans，但可惜離london好遠，只可以放棄。。。

最後決定去Chessington Adventure World Park。。。老實講係真係幾抵，我買既package係包埋一晚酒店，2日既門卷，但因為第一日係我地出發到london，太累都無去到，第二日先去玩，加上要出返london，又唔敢玩太晚。。
個park都幾多野玩，有部份小小曲同小曲都玩到。。。又有動物睇，所以其實都幾值得去，但基本上我覺得一整日都夠，唔洗用到兩日。。

另一個岩小朋友既地方就係natural history 博物館，history當然係唔岩，但入面有好多恐龍同大型動物模型，佢地見到好興奮！

其餘時間，我地都係shopping同食！ 買左超超超超級多衫，人人有份！ primark實左係我地既致愛，買左好多牛仔褲比曲奇仔，好抵，五磅一條！
primark既家居服又係好正，好軟好滑，非常好著！

除左買衣著外，化妝品都係我既目標，呢期發姣成日買化妝品，英國比丹麥平，唔係好多但都叫做平過。。

再講就係食，都係去返去開個幾間。。。一家四口，叫四人份量加一個兒童餐，兩個小朋友share一個兒童餐，兩個大人share個四人餐。。。好似岩岩係監獄出來！ 嚇過幾位侍應！

經過幾翻掙扎，最後係落機前五分鐘訓著左

係酒店陌生地方都訓到，仲以為佢會喊，出奇地乖乖上床

oh my god！ 小小曲是多麼的可愛！！

chessington park的遊覽小火車

小曲非常好奇，又好驚慌

小小曲睇show睇到跳哂舞

小曲好搞笑，好想睇mm，但人地同佢say hi又好驚

我們必到的韓式餐廳，但我覺得而家一舨

其中一個最愛，四川火鍋

呢張純粹係影得我瘦

tgi。。。飽到可以嘔兩輪

natural history museum