iphone 5

呢部係我人生第一部iphone
話說上年開始轉用mac機後，成為apple fans
但apple d野實在太貴！

買iphone5前，我成日都玩大曲部公司電話 iphone4
覺得幾好用，比起我部cheap野LG,快得多！
因為真係貴，所以無諗過會買
但近期又唔知痴左咩線，好想買電話，
最後都買左！

so far都覺得好好用，除左電池真係好快無之外，其他都唔錯
仲download左好多games，係醫院真係靠佢呀！
雖然醫院有得上網，但係龜速！
有部iphone真係苛屎都可以坐一個鐘。。哈哈

淘到寶

今期又淘左衫，iphone case （我朋友話好得，好似貴野，但只係18rmb！），銀包，袋中袋
叫朋友空運左某一d我想要既比我先，其他用sea。。。點知空運都運左成2星期，仲以為唔見左個包裹，嚇死我呀！
今次買到既野，空運收到個部份都好滿意！

呢個係抄款既袋中袋，見韓貨成170rmb，唔捨得買！搵下有無扮款又真係有喎！
平既有9。9，我呢個32rmb，但見佢comment唔錯，收到貨後真係覺得比得抵！d料好靚！
而家我手袋好整齊，唔洗成日左搵右搵！

我想買既係紅色，今次真係買韓貨，都係百幾蚊！ 佢無哂紅色，但個買家話好實用，所以最後都買左！
我本身用緊既銀屯都係呢個格式，但再長少少，無咁大個散銀格，好鐘意呢個格式！ 百幾蚊真係抵，質地又好！

第一個家？

呢排荒廢左個blog！ 其實我都想寫得密d，但因為進出醫院太密。。
話說上次生日引起既苛嘔。。。住左十日院，最終係求醫生既情況下，佢終於放我地出獄！
之後係家留左一星期，呢個星期，隔日就要返醫生覆磅！
每次上磅我就好緊張！ 我自己每次上磅就想跌，小小曲每次上磅就上升！

係家留左一星期，當中磅數都升升跌跌，上星期又再覆磅，又再一次跌左200g！
200g對大人來講，真係苛尿都無左！ 但對小小曲來講，真係有血有淚！
醫生當然又叫我地留院啦！ 雖然真係唔想，但係有需要都無辦法！

係醫院呢幾日，大曲都好慘！因為上次留院，老闆叫佢不如申請長假，等佢地可以請個part time。
嚇到大曲唔敢再請假！ 每日一早起身返工，放工去阿麻家，陪到小曲訓著，就來醫院，到12點先走。
我又唔知做咩，呢幾日係醫院又發燒又嘔！ 早上都好地地，一到晚上就發冷發熱！

今次住左5日醫院，遇返幾個月前係醫院識既廣州人，佢個仔有膽道阻塞，一出世又係做左個手術。
而家定期要去醫院檢驗個肝功能，如果升高就要吊藥！ 佢地都好慘，差唔多住親院都見到佢地唔係覆診就同我地一樣住院

今次小小曲入院，雖然唔係因為咩特別既病，但佢唔係幾想食野，就會瘦，唔肯飲野，又脫水
佢都吊左幾日水，唔知點解，我發覺佢吊親水，都會苛！
仲係係苛水，透明的！ 我同nurse dr講，佢地又話無可能，未聽過吊水會苛！
但我有尿片想証明吊水前後大便，佢地都可以自欺欺人！

不過好彩既係，今次住左5日就可以回家！叫做快架喇！
話醫院似坐監，其實係仲衰過坐監！
坐監都係因為你做錯過事受罰，但我地都唔知自己做錯d乜？
仲要担驚受怕身體狀況！又好掛住小曲，成日咁樣比阿麻，真係衰d講句好過孤兒少少！

自己做完pull through手術，我地已經住院4次！！！ 每次一星期到十日不等！
真係希望呢個cycle可以快d結束！！ 唔想再住醫院！
希望小小曲快d食多d野！ 變返小肥仔！

可憐的小小曲



難得星期六可以放監見下小曲

31歲的大禮

11月又到我生日既日子，我們全家都係冬之子。。。
預定去食running sushi，都幾貴架！ 但話哂生日，雖然成31歲都唔應該慶祝自己愈來愈老！
個日99開車來接我同2個孫，去到阿麻家，小曲苛左督超臭既屎！ 又水又臭！
諗住佢係咁易苛下者，點知去到running sushi，佢唔係好想食野！
小曲喎！唔肯食野一定有病，果然不出廿分鐘，佢開始嘔！！
大曲開始坐立不安，又話要返屋企！ 但坐左廿分鐘到，真係羅友都無坐暖就走！！
最慘呢個係all you can eat！！ 一坐低就比錢！！

返到家，小曲又苛苛地咁！ 第日仲苛緊，但見佢都好有精神，都唔太擔心
點知半夜訓教，係咁嘔！ 嘔到我成身都係！ 大曲就話call夜間醫生來睇佢
打比醫生，佢叫我地直接入醫院，大曲就同小曲入左院！
我就係家清理現場，初初以為係d酸臭味，我自己都嘔左兩獲！

後來清理完畢，都仲有嘔意，最後變成又苛又嘔！！！
打比大曲，佢話醫院話無咩特別叫佢地回家！佢話佢都想嘔！
講完電話我轉頭又去攬住個廁所

等到大曲回來，佢真係去廁所嘔！ 成晚我地兩個都好唔舒服
反而小曲就ok，好快訓返！
大曲就成晚攬住個廁所！ 後來開始好驚會傳染比小小曲！
最後真係比我地估中！！！
六點幾小小曲一起身就嘔，嘔到鼻都噴野！
即刻打比醫院，因為佢一嘔一苛就會脫水！！！
入到醫院，佢地將我地隔離！ 我已經無咩苛嘔，但成個人無咩力！
因為大曲唔係好掂，所以得我同阿麻去醫院！
聽阿麻講，阿爺都中招！

小小曲一共苛左8日！！ 由初初苛水，真係透明既水，到屎水！
每半小時換一次片都唔得，要用2條片！ 食個飯連張椅都濕哂，成張椅係屎水！
小小曲真係好可憐！ 我地苛嘔當減肥！
佢一苛嘔又要吊鹽水！ 最最最慘係，佢由初初既小肥仔，幾個月前肚苛開始，苛到變中仔，再到而家變瘦仔！
到左第8日，終於見到大便有粒粒！ 但都仲係好水！
後來呢幾日都無乜點苛，但磅數一日輕過一日，都唔知點解！！
短短10日，已經無左500g！！ 呢500g可能用左3個月完增到返來！

好彩既係，自從呢次醫生之旅，佢食野多左！之前食糊仔，杰既食一匙，稀既食六匙！
而家少少杰，佢都可以食多左！雖然比起同齡既仲係少！但已經好開心！！

係第十日，都係無咩治療，醫生就係話要等佢增磅先出院
但點增磅？食多d野囉？ 但佢唔食喎！ 等到佢食囉！
你話係咪啤一聲，咁咪者係無了期？
所以我提議比我地返家，可能會食得好d
好彩細佬都爭氣，返左家一日，第日返醫生覆磅，重左185g！！
終於可以出獄喇！！！！！
呢十日真係好辛苦！ 因為大曲唔敢再請假，我同小小曲日日係醫院！
又on居，無野做，又無野玩，睇電視又無聲，上網又慢！訓教又嘈！
好彩都捱過去了！！！！

聽日又要返醫院覆磅！希望又增磅啦！！


又要吊水


雖然住院，都仲有快樂時光
既


好可憐呀


sweet！


話哂都係生日，點少得全家幅

貓琴

呢個貓琴係上年毛毛係加拿大，我又係amazon買左叫佢帶返香港
再係香港寄船比我，我放左一排，到生日先送比小曲的！
我覺得個樣好得可愛，我老爺覺得我可能痴左，仲嫌佢地唔夠嘈咩，仲買個琴。。
實不相瞞，我除左買個琴，呢個牌子仲出左個鼓，入面有鈴鈴吒吒。。我都買埋。。比小小曲做生日禮物
到時佢地就一個打琴，一個打鼓。。。哈哈。。
我覺得小朋友就係嘈架啦，所以我買好多玩具都有聲架但我好怕買野比姑奶個仔，因為姑奶好怕嘈，上次有個人送個琴比唔知邊個，佢帶左去姑奶家玩，都鬼殺咁嘈
所以買玩具比佢個仔，係唔可以發聲的。。

講返個琴先，除左個外型咁cute之外，仲好多function
有得record，又有咪，又有music，又有歌。。
仲有幾重唔同聲音既琴聲，最搞笑係佢連貓叫都做埋琴聲。。者係你彈個keyboard時，會係meow咁叫，但個叫聲又係do ri me fa咁架喎！
係咪好得先！仲有咩jazz 個d揀，仲之好多樣化啦。。。
你放左佢一邊無玩佢，佢又打鼻寒。。。好搞野架！

小曲2歲生日

今年的10月14日係小曲2歲生日，又係阿毛毛生日的大日子。。。毛毛幾歲我都唔記得，反正佢成日話呢個係新曆，佢老人家計舊曆，所以佢都唔在乎。。
今次想整個靚少少既蛋糕，呢到蛋糕我覺得唔係太靚，又貴，又多cream。
我雖然人肥，但好好憎食cream的。。除左ice cream。。

今次突登上網，搵糖膏蛋糕。我估應該似小朋友玩泥膠咁。。又搵左整火車教學。。
小曲鐘意玩車，整火車岩哂佢style啦

因為今年係第二年，我自己都識左少少朋友，就學人邀請朋友來生日會。。
話邀請，其實都係一位朋友＋佢家人咁大把。。。另一個朋友返左香港渡假，唔係請埋佢一家可以扮多人。。哈哈

個生日會我地去左阿麻到搞，因為我地家實在太細，容納唔到咁多人。。
而家咁凍，又唔可以係屋企樓下個公園搞。。。所以問阿麻借個地方。。
又唔洗執屋洗碗。。我地仲早一日去阿麻到整蛋糕part2，麵包等等。。。

生日會貴利完成，人唔多，但我覺得好warm。。幾個好朋友家人咁聚埋一齊都夠了！
最重要係小肥曲佢開心，收到咁多生日禮物呢！

希望小曲快高長大，孝順我地，愛護細佬，做個好人！


呢個就係小曲今年個蛋糕，火車個part我地早一星期同大曲整到半夜！ 蛋糕個part係阿麻到整左幾個鐘。。。好比心機架！


本身諗住生日會前佢訓醒，點知佢又整極都唔肯訓，最後阿爺推bb車佢先訓。。
人地來哂仲訓緊，我地食食下野先起身，一起身入屋，個個望住佢唱生日歌，佢成個呆左。。。哈


呢個蛋糕阿麻做的


開始拆禮物


小小曲都唔執輸，都有禮物收


有新玩具好開心


呢個係我地送的貓琴，我覺得幾過癮

Pullthrough 駁腸手術 （下）

咁耐無寫blog，係因為好忙！ 話說上次做完手術後康復得好快，醫生就叫我地出院。
唔夠一星期，小小曲唔肯食奶，固體就一直都唔肯食架喇，而家連人奶都唔肯飲，搞到脫水又入院住左個幾星期！
其實出院時都仲未完全好返架，係因為日日留係醫院，醫生又無treatment！
都唔知留係到做咩，係吊針都無！ 不過，我都唔想佢吊！ 最後頂唔順，我地建議出院！

好，講返個下集。。。
上回講到醫生話佢unluckly！我即刻喊到爸爸聲！
覺得點解一次又係咁，兩次又係咁！！ 之後醫生有解釋，其實切左都唔係壞事。
因為個到條腸一直都無用，而家係用造口腸駁肛門，其實分別不大。。。
但就可以話呢8個月，個個星期去比醫生拮羅友，喊到力歇聲嘶係有d白廢囉！

做完手術，最緊張既就係等大便出，要大便出左，先叫真正成功！
上次就係無出，最後先知手術失敗左。。。
所以今次真係好大壓力！
1。經過上次手術失敗，成條大腸無左，好驚今次又失敗，連小腸都要切一部分
2。醫生個句unluckly真係係腦海不停出現
最慘係，出大便既野好個人，有人幾日，有人幾星期，咁要等到幾耐，先知手術係成唔成呢？
呢幾日真係日日都生活係惶恐之中！ 成日睇佢條片有無屎！

皇天不負有心人！ 終於比我地幸運返次！
手術第2晚就聽到佢好似有放左個屁，當然唔敢肯定，又無臭味！ 所以我地都無同醫生講，只係自己有小小鬆口氣！
心想，好似有放屁喎，應該成功既！
係第3晚，小小曲訓係我隔離，我同大曲傾計既時候
突然聽到好似機關鎗既聲，之後就pat。。。個時都唔敢相信，心諗又放流彈
係咁易睇下條片，點知。。。。比我地見到日思夜想既。。。黃金！！！
雖則話係黃金，但因為係由個肝流出來先的，係好深綠色既大便！！
我地大曲都控制自己情緒唔敢尖叫！ 真係好似執到金咁！
唔敢相信等左8個月既黃金，終於來了！！！

之後當然係換片換片又換片。。。一日換廿幾次！
最重要係因為做完手術，大便酸性好強
會“那”到個羅友紅哂！ 所以要好密咁換片，有時新片都未包屎又流出來，又換條新片！
同佢羅友查cream查到好似整蛋糕落cream咁，一個羅友都係cream！

雖然我地換片咁密，但紅羅友都要跟隨我地！
我地係美國買左隻cream，係個group既的父母介紹
隻cream本身唔平，加埋運費，真係幾金。。
同埋我初初唔知好唔好用，只買左一樽，但好快已經用左一半！
醫院提供既cream無美國呢隻咁勁！
有次我地訓著左，5小時無換片，個羅友即刻出疹！
查左呢隻cream幾個鐘，又退返！
但呢到個醫生唔信隻cream，叫我地用消毒既濕布墊係傷口，因為個c眼已經紅到有傷口，無左皮
係1小時內，退左既疹又返來！！ 我地問nurse，佢地叫我keep住用呢個方法！
好，我地聽佢講，keep住用布！ 用左大概半日，小小曲連坐低都喊！！
最後我同nurse講，本身都無左疹，而家又搞到出返哂出來，我地要用返隻cream！
我無可能片照換，但就由佢個羅友爛，明明個方法行唔通！
如果只係消毒既布可以醫傷口，咁仲有人發明cream？？？？？
好彩經我地搶救，第日又退左疹！ 真係多謝呢隻cream！
隔日，有個病友既媽媽介紹左另一隻cream，呢隻dk都有得買，就試下。。
原來呢隻都work！最重要呢隻野我地可以向government申請，唔洗比錢！
不過都會keep住用美國個隻，因為真係好work！ 好快就退疹

係醫院到左第8日，由原來腫到好似叮噹咁既小小曲都消哂腫，仲識得笑！
小朋友有到好就係痛苦好快會忘記，到佢大左，唔會再記得而家既痛！
到左第8日，醫生宣佈可以出院了！！



手術第三日，仲係好腫！


男子漢的傷口


終於會笑了


仲識擺pose！

Pullthrough 駁腸手術 （上）

近排無更迎，實在太多事湧埋來。。。
先係早2個月前，醫生用手指探肛後，話覺得肛門內的腸夠闊，可以安排做手術
但因為2個醫生輪流放假，要等到佢地放完假再安排日期
排左9月2號（星期一），前一個星期五要回醫生覆診，驗血等等，睇佢身體o唔ok做手術。。。
個日一早去到醫院，等等等。。等到驗血。。。又再等等等。。等見麻醉師。。。又再等等等。。。等見醫生
醫生再一次探肛，話覺得條腸好似又唔多得，又窄左。。。可能要取消手術。。。
原定星期一既手術取消，改為做x光，照下條腸有咩問題。。。
係醫院一共等左5個幾鐘，，，最後先知做唔到手術，當然好失望！

到星期一返去照x光，2個醫生輪流探肛，無數尖叫同眼淚，最後都決定做手術！
心諗，真係浪費時間，加上小小曲又要受多幾次苦！ 但都無計，有懷疑，係要驗清楚，只可以話小小曲好唔好彩！

手術又再排左一星期後，我地早一日入左醫院過夜，等第二日既手術。。。
同樣地，今次我地都好緊張。。因為係小小曲十日大都做過同一個手術，但因為不幸地條腸打左結，
導致大腸壞死，要成條切哂，同時腸也谷爆左，液體流哂出外！ 所以我地今次真係好驚悲劇重演！
佢無咩腸可以切架喇，唔好咁對佢呀！

手術個日，我地同樣抱住小小曲去做麻醉。。。係咁大間房，全部都係儀器，好多個醫生／麻醉師／surgeon等等。。。
睇住小小曲旱係大曲懷中，再加上佢地既一句 “ I will take care of your son", 真係眼淚都流哂

原地2小時既手術，一做做左7小時，其間護士都有幫我地打去問情況，只收到消息話無咩問題，係比想像中耐。。
聽到都鬆一口氣！但到尾個1 2個鐘真係坐立不安。。。因為真係做左好耐！！
最後手術完成，收到電話叫我地去返麻醉室接返小小曲。。。
去到見到小小曲已經醒左，佢無咩力，但個樣就好唔耐煩，好想喊，又喊唔到個種。。。呢個情景上次都見過。。
真係好慘，見佢咁痛苦，又幫佢唔到。。。唯一可以安慰既係佢而家咁細，到佢大左就會唔記得呢種痛

一直去到病房，佢仲係到叫緊，所以我地就抱起佢，佢真係即刻收左聲。。
隔左一陣，醫生來講解手術。。佢話。。。
開刀後發現肛門內的有裂痕，佢地嘗試去修補，但係補救唔到。。。所以成條剪左。。。
一聽到剪左，眼淚又爸爸聲。。。下，又剪！
醫生仲加左佢。。。“yes, he is very unluckily"...
呢句野，上次爆腸事件，醫生又係講左呢句。。。
真係眼淚爸爸聲。。。點解佢會unluckily成咁！


等待做手術

剛做完手術，大傷口比條片遮住

結婚兩週年

2012年8月27日係我們結婚兩週年的日子。。
上年我地無送禮物，今年當然也不例外！ 
由於而家有2個麻煩友，經過頭一年食食下小曲發爛炸
搞到我地吃完急急腳走人。。。今年我地係屋企食！
大曲訂左sushi，我從未吃過呢間野，因為太貴唔捨得吃。。
大曲係偷偷地訂，先有機會食，如果我知佢訂，係一世都唔會有得食。。。哈

2年前結婚個晚，路經即影即有相機，貪得意影左一張
上年我決定每年呢個日子，都會影一張！
仲記得上年同小小曲影個時仲同大曲講，下年呢到要留返個位，比小小曲個頭！
話咁快，小小曲今年就出鏡喇！ 
小曲係部機入面係咁摟計，又轉又叫，激死！ 好難得先影到一張叫做ok啦！

回顧一週年




一年一度全家幅

毛毛回家了

其實毛毛已經返左香港成2個星期，但到而家先有時間同心情去寫。。。
初初毛毛要來時，都好怕佢成日ee哦哦頂唔順
大喇喇3個月喎，要湊仔個人已經好燥。。。仲要比阿毛ee哦哦，我怕會精神病！
祟不知，毛毛都有d用處喎！ 雖然真係成日ee哦哦，都一早預左。。。
再加烏龍百出。。。
自從毛毛來左，我可以連續訓4個鐘晏教。。。
小曲平時成7點起身，大曲就要起身陪佢。。
自從毛毛來左，佢只係丟低比毛毛，佢又可以返入來訓教。。。
平時送小曲返學，毛毛係家睇住小小曲，我就可以同單車送小曲返學。。。
非常方便，單車一來一回只要15分鐘。。但而家。。仲要準備埋小小曲，夾埋成1個鐘

但黑仔既毛毛，無論去到邊，佢都係咁黑仔。。
我地呢d唔係成日坐飛機，但都叫做坐過廿幾次。。從未試過有cancel flight！
居然比大鄉里毛毛遇到！

話說毛毛星期六晚上9點機，我們一家＋老爺奶奶去送機，4點幾到機場。。
吃左個晚飯，仲call左機場職員來接毛毛入閘
（呢到有個服務基本上係比傷殘人士，有人會幫佢地過關，推到閘口，但毛毛唔識英文，所以我地濫用左個服務）
當然離別唔小得既係幾行鼻涕眼淚啦！ 真係好怕機場接送機呢d咁傷感既場面！
送左毛毛入閘，個時先6點幾。。。已經收到text message話飛機delay左15mins
因為張機票用大曲張卡買，留左佢電話，所以大曲有收到留言。。
不過delay15mins，都好少事。。所以都無理。。
返到家，大曲話，真係唔想毛毛走，我就話佢，咁你頭先係機場又唔喊，扮野
點知隔左一陣，係房大家等仔訓教＋傾傾下計，佢話覺得毛毛好好，係佢咁好個mother in law裡面最好。。
我心諗，唔好怕野啦，你可以有幾多個mother in law呀。。
之後眼淚鼻涕咁出哂來。。。喊到我要安慰佢，我話：我媽係返香港咋，佢唔係死左呀，你唔洗喊成咁喎
不過，都算佢有d人性，唔係做戲！ 佢仲成日話下次要毛毛留長d，移民都仲得。。我心諗，搞掂左我先算啦，移民！

等到d仔訓左。。出去再望一望個電話，又話delay左30mins，我就開始有少少緊張。。
隔左一陣，居然留到個test話取消左班機！ 我即刻好驚慌！
因為又無電話搵到毛毛，佢又唔識英文，估都估唔到飛機會取消架！
大曲就話佢即刻標去機場先，好彩個日借左奶奶架車返家，唔係又要奶好開車來車大曲去機場咁麻煩
我就係家照顧d仔。。。大曲去到機場，個時已經成11點幾，航空公司d counter已經收哂，無人可以問。。
佢走去問information，解釋比個職員聽毛毛唔識英文，個職員一d都唔care，佢可能覺得係機場入面，可以去得邊丫
人地叫佢去arrival到等，可能一陣佢自己行出來。。。大佬，佢連班機取消左都未必知呀，會自己係入面行出來？？

不過，好彩毛毛有個好精靈既女，我一早寫定張卡紙，叫佢有咩事唔識講就比人睇，叫人地打比我
有個職員搵到我，我同佢講我有人係arrival等毛毛，佢就張毛毛帶出來，如果無人等，佢地就會安排佢去酒店

聽毛毛講，係arrival出來個一刻見到大曲，猶如海中浮木，飛撲埋去。。。
就因為cancel flight，我們又偷多一日。。。哈哈
第二日順利地送走毛毛，當然，又要再喊一場。。。好累。。哈哈

下年希望可以回香港見到毛毛同阿公，肥舅話可能一齊返香港，又有機會可以見到老表諾諾！
如果有幸大家都返油香港，真係要去影樓影返幾張家庭照喇！


毛毛的farewell party，在奶奶家



第一次送機


因飛機取消偷來的幾張相






第二次送機

荒廢的一章

見我咁耐無蒲頭都知呢版已成為空置區。。。
但呢幾日唔知做咩好有買衫意慾。。
可以而家出街多左。。。其實只係多左接小曲放學。。每日有10分鐘係街。。。哈哈
又比我發現左個dk網買衫比一般平少少。。。真係好少。。廿皮。。哈哈。。
但佢有好多野都有offer，呢幾日我都沉淪係個網到睇來睇去。。
佢好在仲有free shipping + free return
對我而家超漲爆來講return好重要。。
所以。。。為左新衫＆可以再瘋狂買衫要努力。。。（自己講完都心虛）。。。

Braun Multiquick 5 MR 570 pâtisserie （少on居）

話說有日同d網友吹水，講開整食物比bb食
有人要買部美國出既 BABY BULLET，外型係好鬼cute！ 但睇佢d comment就麻麻地。。
但我細佬都買左部，佢話幾好用喎
好，講返個hand blender，就係咁樣吹吹下水，我就做下searching
見到呢部野可以搞埋麵團，就開始好心動
因為我平時做麵包，最慘就係要用手搞麵團，搞到成手lup痴痴！
上網睇佢個video，好快就搞到個麵團，仲好乾爽！
即刻就上網睇下邊到最平。。。
但其實都要成1400hkd，但咁岩阿姑奶比左封利是阿小小曲，於是我落左格，當部野免費啦。。哈哈

講返部機，佢個切片／絲功能好唔得
放舊carrot落去，會有大概5－7cm係切唔到！
個麵團功能又係有少少把鬼，因為粉類（乾材料唔可以重過250g，好多時做麵包都會係多過250g）
整體來講我覺得有少少side錢
但因為買個時大曲已經制止過我（因為我地已經有部一樣，只係無刨絲同麵團功能，而家呢2個extra都咁廢）
有時要做下樣係佢面前用下。。。

Coleman Sun Shelter

有次睇到個網友去游水帶左個sun shelter，覺得都係唔錯既主意
特別係我呢種唔鐘意曬太陽，但又想去沙灘既人。。。
要setup都唔難，大概5分鐘到，收埋後都唔太阻地
頭先為左寫呢篇野，去左amazon想copy張相
比我見到而家做緊offer，平左10磅！！！！！！
肉痛ing！！

仔＆仔的優

2個仔的好處之一。。。
所有衫都可以留比細佬著。。
而家買衫都會買得爽d，雖然都係就住就住。。
起碼薯兩轉感覺抵d丫 


上年99生日，送左小曲呢張相。。今年99生日，專登用小小曲搵件一樣既衫（可惜小曲上年呢個時候大小小曲3個月，件衫太鬆，搵左件一樣但唔同款），地點（床），pose再影一張

呢件衫我好鐘意，好cute！

2個都係岩岩識坐

上年阿哥頭髮好似甩毛狗咁，比我剷哂。。今年細佬無咩頭髮唔洗剷

呢件衫大曲話好鐘意，問我有無大人款買件比佢喎。。。件衫我鐘意到自己買完再買都唔知（因為係淘寶買），多左個件送左比姑奶個仔