Thermos 真空煲 ＋ panasonic 麵包機 sd p104

今次返香港，買左兩樣好有用既野返丹麥
第一個就係麵包機，之前聽人講panasonic麵包機整包好軟熟，但因為成二千幾蚊，屋企又有一部廢柴麵包機，大曲就唔贊成買
但因為呢部麵包機係我阿姨送的，所以我就要了！ 哈！ 真係要多謝阿姨！
部機真係方便，我本身又鐘意麵包，就算我自己想整唔同形狀的小麵包都可以，較部機幫我搓麵團就ok了！
同埋佢其實唔算大，同3－4人電飯煲差唔多大，但就係比飯煲高！
但真係好有用，無後悔手提佢返來！！

返到來好驚險地，大曲話係香港插，要扮勁幫我換個歐插。。。但換插係要剪左個原本線再換。。。
經過家居幾次意外，我同佢改造既知識好擔心！ 咁辛苦抬部機返來，唔好一次包都未整就蕉左
經我連返恐嚇（我話你整壞左我同你離婚，當然係講笑），但佢知道如果真係壞左我會講一世。。。
加上可能佢都有少少懷疑自己能力。。所以佢放棄換插。。。

部機我真係有用架，而家家裡唔准再買包！我都試過整蛋糕，但因為大曲買錯料，個味有少少美中不足，但個型係ok的
如果係比家人食，唔洗show off的話。。。因為整完個樣係無美感的

另一個帶返來好有用既野就係真空煲，而家小小曲肯食野，但我都係煮爛飯多
因為佢一直都只肯食同南瓜牛肉雞蛋粥，食左兩個月。。。一日三餐
返到香港阿媽就成日叫我買，話好方便。。。其實我本來唔覺方便，因為要預早幾個鐘整定。。。
我覺得要早幾個鐘整，就唔叫方便，方便係一整就食。。
但我都買了，因為覺得好慳電，呢到電費又貴。。我有時又會煲下雞汁。。。都要煲幾個鐘，好浪費！
比我見到呢個款，個樣無平時真空煲咁土。。。又有個小煲仔送
個煲本身係4.5L,送個小煲仔就係3L
我覺得小煲仔反而方便，因為我煲飯都唔需要咁大個煲，但成日洗就好煩，因為太大個！
洗既就方便洗，size岩岩好！
而家買左成日用，先開始覺得好方便，晚上煮左去訓覺，第二日早返熱就可以食
如果用飯煲就要等煮好，凍左，入雪櫃先可以訓，一係就第早一早起身煮！
煲左又可以出街，唔洗睇火！ 好正！
真係無買錯！ 最正就係送埋個小煲，好實用！

老豆！ 好走！

12月5既晚上見到弟婦係facebook用英文寫左句：希望一切無事！
我就多口問佢咩事，點知原來係老豆出左事！
但同細佬了解後，放下少少心！
老豆係大陸時係街暈到，送左去大陸醫院，細佬已經安排大陸表弟接老豆返香港醫院！
知道老豆返左香港醫院，個心都無咁驚！
以為老豆係因為高血壓暈倒，已經唔係第一次！
相信今次都應該會無事，下次要係電腦鬧下佢叫佢唔好成日亂食野！

晚上一直同細佬whatsapp。。。細佬一家係加拿大，阿媽去左幫佢湊仔，人都在加拿大
大家都係係電話上互相連繫！ 成晚whatsapp來whatsapp去，先知原來今次，唔係血壓高！
醫院懷疑係個肝隔離有個瘤爆左，輸左十幾包血，打左好多支強心針！
最後醫生同阿姨（佢地去左醫院，老豆係香港無親人）講，佢心跳得廿幾，都係因為打左強心針！
最後。。。都救唔返！

我地聽到醫生叫家人快來見佢最後一面，都立即上網買機票。即日出發，希望可以見佢最後一面！
但也來不及了！ 他已經走了。。。。最後一面都見唔到！
上年返香港，最後一次見面係同老爺奶奶係家樓下間酒樓吃飯！
今次返香港，係殮房見！

相信每一個係海外既朋友，心入面都著同樣既擔憂！
就係好怕親人命危或過世時，來唔切見到最後一面！
我也不例外！
老豆生時我同佢無咩兩句，死後係阿媽，親戚口中更了解佢多些！
就係因為知道更多，令我更後悔自己從來都無關心過佢。
年輕時只你不停同佢鬧交，同朋友講佢壞話
覺得自己好不孝，生時唔珍惜，死後先後悔！
有句說話真係好岩，但一直都無做到！
「珍惜眼前人」