綠茶雪糕 （有食譜）

一直都好鐘意食綠茶同紅豆雪糕！ 但呢到無得買
好耐之前，大曲搵到一間日本餐廳有得食，為左呢個綠茶雪糕，我地去左呢間餐廳！
個杯雪糕得一個球，但就成60幾蚊港幣！ 而味道。。。我只可以話如果有得選擇我唔會食。。
到左上上年xmas，大曲家姐知我鐘意，又做左綠茶雪糕比我做聖誕禮物。。。
心意十分，但味道0分。。哈哈。。我知我好衰。。但真係唔好食，完全係冰狀
但當然唔想令家姐傷心，我就扮話好吃啦。。

不過，係家姐啟發左我，我先知原來雪糕係可以自己整。。。
當時我無雪糕機，我就跟網上既食譜，用手自己搞。。
食譜有說明要加入適量既綠茶粉，但因為我的綠茶粉係好貴，我太孤寒只落左好少。。
整出來都係唔太好吃。。。

把心一橫，返到hk要買部雪糕機。。。
上年返hk，買左一部小型（1.4L)雪糕機，係台灣時，又係天芢茗茶買左一大包綠茶粉。。。
諗住今次返丹麥，可以吃過夠。。。
誰不知，返到丹麥又有左，唔可以飲咁多茶，綠茶雪糕仲要加大量茶粉。。
所以一直無做到。。。

到左而家。。。小小曲出世，再無顧慮！ 
第一次用雪糕機整綠茶雪糕，今次我用書中食譜 （本書係台灣買的，叫“我愛冰淇淋”）
食譜話，加入3匙綠茶粉，我就巔狗咁用湯匙去落，仲要匙匙好似山咁高！
d粉多到搞都搞唔起。。哈哈。。。最後個雪糕係好濃既綠茶味，但都接受到。。

好喇，長話短說，做左幾次，呢個係最成功，我覺得最好味既食譜

A
綠茶粉 適量，隨個人口味，如果加唔夠，稍後可再加濃
糖  1茶匙

B
蛋黃 2隻
糖 50g （食譜寫70g，我試過，但我鐘意吃少糖，試過30g，但唔太好味，50g我覺得ok的）

牛奶 200ml
鮮奶油 250ml

將a和b分別搞勻
b要搞到淺黃色
牛奶煲滾
將煲滾的牛奶續少加入b （一次過太多，d 牛奶太熱會煮熟隻蛋黃，每次少少咁搞，會快d涼）
牛奶和b完全混合後，將少量牛奶混合物加入a （原因時先將綠茶粉變漿）
將綠茶漿加入牛奶混合物，再放回煲內煲到較杰身就ok （ 煲前可以試下味，唔夠可再加綠茶粉）
待涼再放入雪櫃直至完全冷凍

cream可以發起or不發起
我有自己發左先，發到泡沫狀，將綠茶牛奶綠加入，慢慢拌勻
最後放入雪糕機20分鐘
如果鐘意吃軟身的可以即食，我鐘意硬身，我再放入冰格雪幾小時到過夜先再食

回家了！

住在醫院剛好滿一個月，終於可以回家了！！
整整一個月都住係醫院，每日都見到不同既患病小朋友和家人，有d病情較嚴重，有d較輕

1。bb係肚內的腸生左出體外。。呢個係大曲8返來的
我一直唔明點樣可以生出體外，有機會接觸佢媽媽時，順便自己8下。。原來bb係個肚上有個大窿，
d腸就係個窿到跌哂出來。。我就問媽媽，咁你見到bb出來時，咪好驚。。
佢話，唔驚呀，我一早知。。。我問你點知呀。。佢話原來係照第一次超聲波時已經見到腸係出哂體外
呢個媽媽真勇敢，好老實講如果我第一照超聲波已經見到d腸係生哂出來，我可能會終止懷孕
呢個媽媽仲係單親，佢個仔又好摟計，可能係因為病，所以媽媽好“就“佢。。
阿仔每段時間只吃一種食物，如今星期只吃雞，但今日我要curry味，聽日要燒雞。。。
如果唔係佢想要既，佢可以真係一粒都唔放入口！

2。bb一出世就缺乏一種細胞，呢種細胞係幫助器官生長。。
醫生同佢父母講，到bb24歲大既時候都無事，佢就會一直無事。。
但bb而家先得2歲半，個日見佢，阿b岩岩做完手術。。
但2個鐘後，醫生又話要再做手術，原來係手術後發現內出血。。
個晚我地係房，聽到阿仔無力既叫聲，都“登“佢父母慘。。
做完無耐又要再做！ 送bb去做手術既心情，真係好難受！
雖然你話做手術對bb係好事，但都話哂有風險，仲要係比人開刀。。
當你見到麻醉師用氣將bb焗暈麻醉個刻，真係好驚佢之後唔會再返來

3。 bb肚內既腸打左結，做手術將結解開。。
過幾日，佢地出左院。。佢父母仲同我地講，祝我地早日回家
唔夠2日，又見佢地入返來，原來阿仔之前做既手術，有2條喉直接插入胃部
要用喉去餵食，但條喉“咩“左，食物沒有去到胃部，流哂出體內
又要返醫院再做手術

4。bb天生沒有肛門，做手術開肛門，呢個已經係小手術

係醫院住既呢段日子，真係體會到做父母擔心子女既心情
身體健康，做個好人，就已經足夠！
希望所有有病既bb都快d好返，無病既繼續健康！！



醫院d護士好好人，多得呢個護士小姐，夜間個幾晚幫我地全晚睇住小小曲，好等我地可以訓耐d


呢位姐姐又係好好人，佢好鐘意小小曲

小小曲第二次手術

有一段時間沒有更新了。。因為小小曲的第二次手術，都沒有心情打blog。。
自從第一次的手術後，我們一直等的都是大便。。。
做手術就是為了恢復排便功能。。。第一次手術後，醫生說有切了40cm的大腸（一共有70cm）。。
看到小小曲做完第一次手術，有時看到他痛苦的表情，但還過得去。。因為一直都有用媽啡止痛。。
我們等的大便，一直都沒有來。。。醫生每天來看他，都說有人快，有人慢，叫我地等。。。
我們一等就等左10日。。其間佢每晚係咁喊。。。比人奶佢飲，飲完就好似噴泉咁全部嘔返哂出來。。。
嘔完人奶，嘔胃液。。嘔完胃液，再嘔膽汁。。。見到佢都覺得好辛苦。。。
但醫生都話正常，我地都唔知可以做到d咩。。。已經每飲1－2分鐘人奶，就幫佢掃風！
飲一餐10分鐘，可能已經掃左8次風。。。個肚好似鑼咁大。。。。

直到第10日，有另一個醫生來睇佢，好果斷咁話，10日已經好耐喇，要幫佢做注入液體的x光
就因為呢個x光，先發現原來大腸比小腸打左結，大腸因沒有血流入而壞死了！
而小小曲係呢10日因為有入無出，出都係上面出，太谷既關係，谷到條腸穿左個窿。。
本身係腸內既野流哂出腸外！
醫生話要即日做手術，先要切哂成條大腸，再係肚上加個大便袋排便，等肛門位置好返，先把腸轉駁到肛門！

今次手術後再去睇小小曲，真係崩潰。。。
上次手術仲未好既傷口上，再切一條較長的。。。個肚又開左個窿放左條腸出來
個口又插住喉，見佢個時仲係半醒，表情係極度痛苦，連喊都無力。。。
最慘係見佢咁，你都唔可以做到咩，只可以睇住佢痛。。。。

自從第一次手術毫無進展，醫生都只係叫我等之後。。。我一直都好無信心。。
所以今次手術後，我要親眼見到d大便由綠色變成黃色，我先會安心（證明係飲完人奶排出來的大便）
好好彩，今次康復都算快，手術後第4日，就見到人奶屎喇。。。總算放下心頭大石。。。
而家等小小曲有增磅，我地就可以返屋企喇。。。
當然，仲要不停返來覆診，過多幾個月又要拆大便袋，再做手術。。。
但總算見到曙光！ 
希望小小曲快d好返，做個正常bb呀！


最讚的情人節！ （小小曲第二次手術後）