仔＆仔的優

2個仔的好處之一。。。
所有衫都可以留比細佬著。。
而家買衫都會買得爽d，雖然都係就住就住。。
起碼薯兩轉感覺抵d丫 


上年99生日，送左小曲呢張相。。今年99生日，專登用小小曲搵件一樣既衫（可惜小曲上年呢個時候大小小曲3個月，件衫太鬆，搵左件一樣但唔同款），地點（床），pose再影一張

呢件衫我好鐘意，好cute！

2個都係岩岩識坐

上年阿哥頭髮好似甩毛狗咁，比我剷哂。。今年細佬無咩頭髮唔洗剷

呢件衫大曲話好鐘意，問我有無大人款買件比佢喎。。。件衫我鐘意到自己買完再買都唔知（因為係淘寶買），多左個件送左比姑奶個仔

城堡野餐

是次行程為城堡野餐。。。
大曲話入去城堡行下。。。
但後來知道要比入場費，我就話係外野食下野算啦。。
外面環境都唔錯架，我仲帶左個sun shelter去（狂比人歧視）
大曲話丹麥無人會用，個個都鐘意哂太陽喎。。
但太陽我真係怕怕。。。無哂已經有印尼，泰國，菲律賓以為我係同鄉。。
哂左連非洲都問我係咪同鄉。。。

今次野餐我地無上次咁巔，只帶左一個lunch既食物＋甜品
但全部都係大曲住，住左成晚住到12點。。。哈


後面就係城堡喇


小曲食阿爸做的肉丸吃到津津有味。。。




一齊踢波


到小小曲影寫真，後面仲有路人甲丙


小小曲與毛毛

遊哥本哈根

毛毛來左咁耐，最多係去醫院同奶奶家。。。
因為我自己唔多出街，又唔係幾識路。。所以我都無帶毛毛去city玩。。
難得大曲請左三星期假，小曲又開始放假，所以我地帶毛毛去遊下。。。。

先去了星期日免費的博物館。。行到腳軟！
隔日再去左新碼頭，遊船河

上海排骨（豬扒）菜飯

呢個菜飯連大曲都鐘意食！ 下次可以再encore！ 

材料：
飯＋小棠菜＋薑
豬扒＋蒜頭＋乾蔥

豬扒／排骨
醃料：
豉油
胡椒粉
酒
粟粉
＊原食譜仲有加糖，鹽，薑汁，但我個人煮野食好少會落糖，而“業”肉我唔落鹽，薑汁我無

飯
先將飯煮熟（原食譜有用雞湯煮飯，但我因為要比小曲食唔想落咁多味精，所以我都係用水煮）
小棠菜切粒，熱獲加油，落薑，先將菜莖炒一炒，因為較難熟，咁上下就落菜葉＋鹽，大概炒到8成熟
倒走水份，再用麻油撈一撈，我有落大量麻油，因為我鐘意麻油香
走後加入白飯再撈勻

豬扒
一般豬扒咁煎（肺話），我用中細火，煎到金黃色，熟就上碟，剪細件少少
再落蒜蓉，乾蔥蓉，（因為毛毛唔叫辣，下次我自己做會加辣椒仔絲）份量隨你鐘意，我鐘意食蒜蓉所以我加好多，但之後胃氣出來臭死人。。。
爆香後再加豬扒燧咁易炒一炒

Prince Lionheart Wipes Warmer at Amazon

其實今次並唔係想介紹部機。。。
因為我仲未開始用，等遲d凍先用。。。
作為一個肥c9。。要為家庭慳錢。。。慳電！

今次係想講下amazon要讚讚的！
因為dk買野好貴，所以如果我要買野，多數都係上網買。。
而amazon uk係我成日shopping既網站
一來，amazon uk，大家都係EU，寄來dk我地唔洗比tax
二來，amazon有好多物品買夠25磅就免運費
三來，價錢同種類都比dk多

話說今次買左個warmer，送到來時我滿心歡喜。。。
但對個火牛唔太滿意，因為好大個，加上係uk（者係hk 3腳插），要再用轉插就會好大一舊野
比大曲睇下，佢“立”眼見到個火牛label，再屈指一算，話個火牛好食電。。
佢計一計，要成hkd1.4／分鐘，而呢個野係要24小時都開住。。
咁樣一個月咪成皮幾野電費。。
嚇到我即刻話要refund

但講到refund，因為係uk寄來，要refund當然要寄返去uk。
問題就係到！ 上網睇過有講到如果係你自己反悔，就要你自己比運費。。
再check一check，要成300幾蚊運費，同部機差20元！！

無恥的我再睇返佢個product description，無講到power supply
就諗坐博一博問下個客服可唔可以退錢。。
一開波我就同佢講我買左呢部機，今日收到，但見到個用電量好多，而你地個產品介紹又無講到，想refund。。
點知個客服二話不說就叫我等等。。。
之後就覆我話個運費好貴，佢會安排個refund，但就叫我keep住部機
我仲以為自己英文理解有問題，點會咁好又肯refund又唔要部機
我耍reconfirm一次佢講既野，我仲問佢部機係咪等你搵人上來收
點知佢答我，你鐘意點樣處理部機都ok，你捐左佢都得。。。
簡直唔敢相信會有筍既野，雖然部機用唔到。。。

但後來，我地去阿老爺家，佢係工程師，問開個用電量！
先知阿勁人大曲計錯數，其實話我晾後炮都好，我都唔係幾信咁貴一分鐘（咁貴呢部機仲可以係市場上發售？？？）
所以而家我地係又有refund，又有機！
筍！

一週過後。。。（170磅）

依然固我。。。。
無做運動，無節食。。。。
仲要重左。。。。
哇哈哈哈。。。

終於等到了！

好消息！ 尋日帶小小曲去覆診，醫生話可以做手術，關左個假肛了！！！ 
話說呢個假肛，已經係小小曲身上有5個月喇！
初初醫生話，會用3－6個月。。。終於捱過左呢個時期！
雖然仲有個幾月先做手術（醫生話大概8月中到），但起碼見到終點！
呢個手術，會將個假肛條腸，駁返落肛門。。。
以後就可以用pat pat苛c，唔洗再係個肚到苛喇！！

呢幾個月用呢個假肛袋，真係好唔方便。。。
成日都好驚佢個袋漏，每次漏都要用15－30分鐘去再貼個袋
初初就用30分鐘，而家已經係熟手技工！
因為個袋成日漏，d大便“業”住d皮膚，d皮膚極度敏感！
紅哂不特止甚至爛爛地！有時搞到個袋都貼唔到！

講真，有時真係街都唔敢去太遠，因為如果係途中又漏便，都唔知點算。。
可以做手術，真係天大既好消息！ 為止，我仲狂吃，慶祝一返。。。
除左可以做手術外，醫生仲講左幾個消息，係我，直都擔心住。。
因為太技術上既野，費事係到解釋咁多。。。
講左你地都唔會明。。都唔希望你地需要去了解
總之，尋日聽到話可以做手術，真係成個人鬆哂！
今次，手術真係要順順利利！ 醫生們要生性，唔好再搵我個仔較飛喇！！！

慈母的女兒

我自己本身係鐘意仔多d，但因為已經有仔，就會想要個女。。。
但個天安排左2個仔比我，我都一樣咁鐘意！ 

2仔有幾個好處
1。唔洗再買衫／玩具
2。女d衫／飾物太靚，會破產
3。唔洗驚比男仔呃
4。我自己覺得女仔把聲太尖，好嘈
5。2兄弟大家有playmate
以上係我個人用來自我安慰既方法。。。

可惜慈母話，2個夠哂數，要收爐喇！
為左滿足女既慾望，耐唔耐都搞d花款。。。

如果咁細既bb有咁長頭髮，都咪話唔驚。。。

小小曲出牙了！

5個月大既小小曲，終於出左2隻門牙仔喇！
呢排佢可能牙痕，飲奶時咬左我幾野！ 痛到我大叫呀！
遲d上下門牙都出哂，就大獲！ 希望佢識性，唔好咬我啦！