6日London之醫院篇

去旅行要睇醫生，真係未試過。。。好多時真係有病，都係會死忍，去買d成藥吃就算
但估唔到今次旅行，我地成家都要係醫院訓一晚，最慘既係，主角唔係我地，係可憐的小曲。。。
到達london的第三日一早，發覺小曲有發燒，同埋無平時咁好動
所以我地就決定我自己去行街，大小曲就留在酒店
我叫大曲去退燒藥，所以我地一齊出門口。。
到我自己行街行左半粒鐘左右，就收到大曲電話
大曲話小曲先是雙手勁震，口吐白泡，咀唇發紫，最後休克，停左呼吸半分鐘。不過已經醒返
個時真係好驚，佢話已經叫左白車，我地就係醫院會合
個刻真係驚到瀨，唔知點算，即刻跑上巴士。。。
去到醫院個救護人員來帶我搵佢地兩父子，救護員第一句就話“你放心，你bb而家無事“
聽到都唔知係因為谷得太耐定係放下心頭大石，忍唔住喊，佢就係到安慰我
去到急症室見到大曲抱住得返條片既小曲，就覺得好可憐
小曲係咁ee哦哦，可能太熱，又唔舒服。。。等左一陣，就送左我地去兒童病房等
期間有護士，實習醫生，醫生，高級醫生來睇小曲，同佢做檢查
最後醫生話應該係出水痘+喉嚨發炎，但我覺得唔係出水痘
因為小曲有打針，同埋成身身先得個3 4粒疹，又唔見佢痕。。
不同，醫生都決定要我地隔離，驚傳比其他小朋友

後來醫生話想抽血染下有無感染，成個過程最慘就係呢到！！
因為護士太忙，佢地只好落手落腳做，係人都知醫生唔識抽血
係護士先係熟手技工，見佢地準備時雞手鴨腳已經有d擔心
好喇，開始要抽，先拮手背，搵唔到血管，支針係皮下上下左右360度轉去搵，我仲見到個針尾係皮下挑起，差少少仲拮返出來
小曲已經勁喊，喊到好痛苦，唔好話佢，我見到都好痛！ 就係咁，支針係皮下挑左5－8分鐘，都無血。佢地就抽返支針出來。。
再拮腳背。。。同樣，又喊得好淒厲，3個人按住小曲，我見到都忍唔住流眼淚，幾驚佢又再次受刺激休克。。。
個女醫生見到我流眼，佢都唔好意思，個高級醫生直情唔敢望我。。如是者，再拮左5－8分鐘，終於搵到血管！！！！
但個設備實在太簡陋，居然唔係用吸管去將血吸出來，係用人手用推小曲隻腳，血係一滴一滴咁滴出來。。。
推左2支管，先停手。。。。我心諗，2支你就咁滴者，如果10支滴到幾時！！

最後，送左我地去單人病房隔離，等報告同時叫我地今晚最好留院觀察，因為小曲雖然已經醒返，但仲有發燒
佢驚我地返到酒店又有咩事，咁我都覺得留院會安心d，話哂即將有人來睇佢
醫生同護士都好熱心，護士每隔1－2小時就入來幫佢量體溫，又比藥佢食
個實習醫生仲好熱情咁入來同我地吹吹水。。。個時小曲已經退左燒，係床到得條片同對襪咁行來行去
係人入來就同人笑，迷到d醫生護士暈陀陀。。。
到第二日下午，護士話可以回家。。燒已經退，我們就回酒店

講起醫院付費，真係唔可能唔善慕歐洲人。。。本身自己國家睇醫生已經唔洗比錢
生仔又唔係同人迫，同人爭，自己一個人霸哂成間房，仲可能叫埋老公一齊住，bb一出世又唔洗送去bb房，可以同自己同房
雖然只係得2日，但真係酒店式既服務，有問題又可以問護士。。仲有私家廁所沖涼房。。。
但估唔到，去到歐洲另一個國家，都同樣受到咁既待遇！！！
我地住左成晚，1蚊都唔洗比，拍下個屁股就走人。。。雖然。。我地唔恨住。。
但比係香港，要自己買旅行保險，係國外住院分分鐘幾千蚊咁計。。真係好金。。
旅行途中病左已經好慘，仲要比咁金既醫藥費。。

一早起身已經唔對緊，頭熱熱。。。

因為唔舒服，不停ee哦哦發皮氣，實習醫生要吹波波tum佢開心。。。。醫生真難做，哈

開始無燒就囂喇，係到扮李小龍





次次入院都係用呢個笑容去迷惑醫護人員。。。又唔見佢係餐廳咁做，博多塊牛扒比我地。。

被針在皮下挑上挑下，成個針口都腫左





醫院景色雖美，但真係唔恨